Programa de incentivos á contratación por conta allea
·
Marta Gimenez
Prazo: 31/01/2025 – 30/09/2025
Descrición: A Consellería de Emprego, Comercio e Emigración convoca axudas destinadas a favorecer a contratación por conta allea de persoas desempregadas na empresa ordinaria e en entidades sen ánimo de lucro. O obxectivo principal é incentivar a incorporación ao mercado laboral de colectivos con maiores dificultades de inserción, tales como:
Persoas mozas.
Mulleres.
Persoas paradas de longa duración.
Persoas de 52 anos ou máis.
Persoas emigrantes retornadas ou estranxeiras.
Mulleres en ocupacións masculinizadas.
Persoas con discapacidade ou en risco ou situación de exclusión social.
As modalidades de incentivos inclúen:
a) Incentivos á contratación indefinida inicial de persoas desempregadas.
b) Incentivos ao incremento de xornada das contratacións indefinidas, pasando de tempo parcial a tempo completo.
c) Incentivos ao incremento da duración anual dos contratos fixos-descontinuos a un mínimo de 9 meses.
d) Axudas para a adaptación de postos de traballo de persoas con discapacidade.
Beneficiarios: Poderán acceder a estas axudas as persoas empregadoras e empresas, independentemente da súa forma xurídica, incluídas persoas autónomas, sociedades civís e comunidades de bens, aínda que carezan de personalidade xurídica, que contraten persoas traballadoras por conta allea para prestar servizos en centros de traballo situados na Comunidade Autónoma de Galicia. Tamén poden ser beneficiarias os centros especiais de emprego (excepto para contratacións con persoas con discapacidade) e as empresas de inserción laboral (excepto para contratacións con persoas en situación ou risco de exclusión social).
Requisitos adicionais:
As contratacións deben formalizarse con persoas desempregadas pertencentes aos colectivos mencionados.
As contratacións deben supoñer un incremento neto do cadro de persoal da empresa.
As persoas ou entidades solicitantes deben estar ao día nas súas obrigas tributarias e coa Seguridade Social.
Contía/presuposto:
A contía das axudas varía en función da modalidade de incentivo e das características da persoa contratada. Por exemplo, para a contratación indefinida inicial, os incentivos poden oscilar entre 4.000 e 10.000 euros, dependendo do colectivo ao que pertenza a persoa contratada.
GL_ES 
ES