A conselleira do Mar, Marta Villaverde, visitou o 23 de xuño o Centro Tecnolóxico do Mar (Cetmar) no marco dos Diálogos Cetmar, espazos de encontro entre a administración, o sector e a investigación. Na súa intervención, Villaverde destacou o papel central desta entidade na transferencia de coñecemento, a innovación tecnolóxica e o desenvolvemento de solucións aplicadas para os diferentes elos da cadea mar-industria galega. O Cetmar actúa como nexo entre a ciencia e o sector produtivo en áreas como a dixitalización da frota, a trazabilidade do produto, a sustentabilidade medioambiental e a formación técnica especializada. (…)

O 25 de xuño, Galicia formalizou na sede da Representación Permanente de España ante a UE (Reper) o traspaso de funcións para asumir a portavocía do conxunto das Comunidades Autónomas nos Consellos de Ministros de Agricultura e Pesca (Agrifish) da Unión Europea durante o próximo semestre. O relevo faise conforme ao sistema de rotación da CARUE (Conferencia para Asuntos Relacionados coa Unión Europea), con Andalucía como comunidade saínte. A delegación galega traballou na sesión para analizar o peche da presidencia saínte de Chipre e as liñas estratéxicas da próxima presidencia de Irlanda. (…)

A Xunta de Galicia e a Confraría de Pescadores de Carril asinaron un convenio de colaboración para recuperar os bancos marisqueiros danados polos temporais e pola baixa salinidade rexistrada a comezos de ano. O acordo, autorizado polo Consello da Xunta e cofinanciado polo Fondo Europeo Marítimo, de Pesca e de Acuicultura (Fempa), conta cun investimento de 100.417 euros e centrarase principalmente nos areais da Concha de Compostela e A Fangueira, cunha superficie duns 60.000 metros cadrados. Preto do 70 % do orzamento destínase a garantir ingresos para 50 mariscadoras que participarán nos labores de rexeneración. (…)