O 25 de xuño, a Xunta de Galicia organizou en Bruxelas, en colaboración co Comité Europeo das Rexións (CdR) e a Conferencia de Rexións Periféricas Marítimas (CRPM), o debate estratéxico titulado “Trazar a reforma da PPC para garantir o futuro da pesca e as comunidades costeiras de Europa”. A conselleira do Mar, Marta Villaverde, presidenta do Grupo de Traballo de Pesca da CRPM, expuxo a posición común das rexións marítimas de España, Francia, Italia e Portugal ante eurodeputados, representantes da Comisión Europea e do sector. O manifesto impulsado por Galicia reclama reequilibrar os tres piares da sustentabilidade (ambiental, económico e social), substituír o enfoque punitivo do deber de desembarco por un modelo preventivo e baseado na selectividade, eliminar os límites de arqueo que frenan a renovación da frota e reforzar a igualdade de condicións fronte a importacións de terceiros países. (…)

A conselleira do Mar, Marta Villaverde, reuniuse o 23 de xuño con representantes da confraría de pescadores de Corcubión (Costa da Morte, A Coruña) no marco dunha rolda de contactos directos co sector que foi realizando en diferentes puntos da costa galega. Estes encontros teñen como obxectivo coñecer de primeira man as necesidades e preocupacións dos pescadores artesanais, recoller propostas de mellora e trasladar información sobre as axudas e programas dispoñibles. A Costa da Morte é unha das zonas con maior actividade pesqueira artesanal de Galicia, con confrarías que traballan o percebe, o marisqueo e diferentes artes menores. (…)

A directora xeral de Desenvolvemento Pesqueiro, Ángeles V. Suárez, visitou o 25 de xuño o Centro de Formación A Aixola, no porto de Marín (Pontevedra), para avaliar a súa programación. A dotación económica para 2026 ascende a 418.000 euros, fronte aos 236.286 do ano anterior, o que supón nun incremento do 77%. Este aumento permitiu estender a oferta formativa aos dous semestres do ano. O centro, xestionado polo Cetmar como medio propio instrumental desde 1997, ofrece 168 prazas repartidas en 12 accións formativas de media e curta duración (de 70 a 408 horas) en especialidades como a confección de artes de pesca, electricidade e hidráulica naval, carpintería náutica CNC e reparación de embarcacións neumáticas. (…)