A directora xeral de Desenvolvemento Pesqueiro reuniuse con representantes da Confraría de Pescadores de Mugardos para abordar as necesidades do sector. Entre 2025 e 2026, a Consellería do Mar mobilizou máis de 138.000 euros para a entidade: 72.120 € en 2025 e 36.327 € en 2026 para xestión sostible da pesca costeira artesanal; 10.790 € para conservación da biodiversidade mariña (rexeneración do hábitat na ensenada do Baño e sementeira de ameixa babosa, con case 1,5 millóns de exemplares e 29.000 m² de superficie acumulada); e 19.178 € para mellora da comercialización da ostra rizada e mantemento de bancos marisqueiros, incluíndo a adquisición dun remolque multifunción. (…)

A Consellería do Mar e a Confraría de Pescadores de Arcade entregaron e colocaron 103.500 unidades de semente de ostra plana europea (Ostrea edulis) na ensenada de San Simón (ría de Vigo), no marco do proxecto científico Ostreares (2024-2027), cofinanciado polo FEMPA. A semente procede do criadeiro do CIMA de Ribadeo e destínase a estruturas de cultivo e preengorde xestionadas directamente polas mariscadoras a pé da confraría. (…)

A Organización de Produtores de Pesca de Cerco de Galicia (OPP-82 Acerga) presentou na lonxa de Sada, co apoio da Consellería do Mar, a campaña Saborear o cerco con peixe de Acerga, destinada a poñer en valor a diversidade dos produtos capturados pola frota de cerco, que traballa con máis de 50 especies. A iniciativa busca achegar aos consumidores tanto as especies habituais (sardiña, xurelo, cabala) como outras menos coñecidas pero con grandes calidades nutricionais e gastronómicas, como a boga, a agulla, o sargo ou a chopa. (…)